Хүний хөгжил сангаас иргэн бүрт олгож буй 21 мянган төгрөгийг бөөнөөр нь олгохоор болсон байна. Энэ талаар Хөдөлмөр, халамжийн үйлчилгээний газрын Халамжийн үйлчилгээний хэлтсийн ахлах мэргэжилтэн Д.Ганчимэгээс тодруулсан юм.

-Хүний хөгжил сангаас олгож буй мөнгийг иргэд бөөнөөр нь авах боломжтой болсон гэсэн. Энэ талаар тодруулахгүй юу?
-Энэ бол иргэн банк хоёрын хоорондын асуудал. Түүнээс манайхаас бөөнөөр нь өгөх журам байхгүй. Харин хүн бүрийн 21 мянган төгрөгийг cap бүр банкинд байршуулах ёстой. Өөрөөр хэлбэл, хүний хөгжил сангийн тухай хууль тогтоомжид зааснаар хүний хөгжил сангийн мөнгийг cap бүр олгох учиртай. Ямар нөхцөлд бэлэн мөнгөөр өгөх юм бэ гэхээр иргэд итгэлцэлийн гэрээ байгуулж, нэгдэн нийлж 10 саяаас доошгүй мөнгийг бэлэн бусаар авах юм. Харин 21 мянган төгрөгийг бэлнээр нь олгох ажлыг одоогоор туршилтаар явуулж байгаа.

-21 мянган төгрөгийг олгож байгаа бүх банк энэ мөнгийг бөөнөөр нь олгох уу?
-Одоогоор "Хадгаламж" банк туршилтаар бөөнөөр нь өгч байгаа юм билээ. Тухайн банк, иргэн хоёр гэрээ хийж, хүүгээ тохироод мөнгөө урьдчилан авч болох юм.

-Цаашид энэ мөнгийг тарааж байгаа гурван банк бүгд энэ үйл ажиллагаанд шилжих үү?
-Цаашид манай талаас банкуудынхаа тоог нэмэх бодлого баримтална. Яагаад гэхээр Монгол Улсын иргэн бүр банкнаас үйлчилгээ авч байна. Тиймээс иргэдэд чирэгдэлгүй түргэн шуурхай үйлчилгээ үзүүлэх үүднээс техникийн дэвшилтэд технологийг ашиглах юм.

-Одоогоор шинэчилсэн бүртгэлд хамрагдсан хэчнээн иргэн 21 мянган төгрөгөө авсан бэ?
-Иргэний шинэчилсэн бүртгэлд бүртгэгдсэн нийт нэг сая 686075 иргэний нэр Улсын бүртгэлийн ерөнхий газраас баталгаажиж ирсэн. Үүн дээр 16 хүртэлх насны 710116 хүүхдийг нэмсэн. Өөрөөр хэлбэл, хоёр сая 389191 иргэнд гуравдугаар сарын 31-ны байдлаар 21 мянган төгрөгийн хишиг хувийг хүртээгээд байна.

-Энэ хугацаанд хэчнээн төгрөгийн санхүүжилт ороод байна вэ?
-Санхүүжилтийн хувьд I-III сард нийт 159,5 тэрбум төгрөг, энэ сард 58,3 тэрбум төгрөгийн санхүүжүүлсэн. Нийт 217,8 тэрбум төгрөгийн санхүүжилтыг эхний дөрвөн сард хийгээд байна.

Энэ талаар "Хадгаламж" банкнаас тодруулахад "Ер нь бол урьдчилан олгож байгаа гэж хэлж болохгүй. Гэхдээ Нисэх, Сүхбаатар аймагт туршилтын үйл ажиллагааг эхлүүлсэн. Энэ мөнгийг бөөнөөр нь авахад тодорхой хэмжээний хүү бодно. Гэхдээ бусад зээлийн хүүгээс бага" гэсэн юм.